sranan

Uma kaba

Manboy opo tenapu
Mek’ mi naki anu gi yu
fu puru yu na ini na fa-fu-du-libi
alakondre angisa m’ e bradi
Fu opo yu yeye

Uma kaba kaba f’ e dreygi
e tanter’ mi manboy
gi en lespeki,
bika ‘a kabra d’ e tyari en
ben tay tu na anu nanga futu

pansboko ensrefi b’ e kisi
f’ waki fa basya b’ e bradi ensrefi
f’ kroypi go na ini yu mindrifutu
a no ben man fu bari

en mofo ben sroto nomo
f’ a ben kan tan na libi
f’ dresi, frifi den soro
di basya ben gwe libi gi yu

uma kaba f’ e tyar’ prati
f’ di yu abi bray-doksi
nanga pompeya
yu kisi leri di mi no kisi
ma a kat’fisi di mi nyan
a no kiri mi

mi na aneysi wwiri mi ben abi lek’ sopo
ma bromki m’ e fruga lontu mi manboy
bika mi ondrofeni tak’ lobi
e dresi malengri

yu b’ e libi na ini weti-ston-oso
ma mi pras’oso graniwan
leri mi san na a warti fu libi
a skoro dat’ yu misi

mi broko-skotu-planga-oso
b’ e gi mi okasi f’ troki
‘anga den star’ a fermamenti

munkenki b’ e mena mi kuneti
wan switi morgu na fosi lafu f’ son
b’ e winsi mi bifosi mi
opo f’ gwe libi mi udu gaba

mama fu libi bosi mi ati
mi sabi uma warti
mi sabi den krakti

uma kaba f’ e spenkispenki
nanga brenkibrenki f’ kor’
mi manboy en sraften krabyasi

kaba f’ e dans’ barmaske
nanga na fesi
di e banawtu yu yeye

uma n’ e dreygi n’ e tanteri
bika malengri manboy e tyari
takru-fesi-siri kon panya
gi den uma pikin di wi lobi so tranga

uma krin pasi gi wi gran pikin
mek’ wi teri
mek’ wi no frodyadya
den manboy…

 

Celestine Raalte